相隔一個月返去搵馮醫生，亦都係相隔差唔多一個月再見黃小b 
(上次照超聲波已經係11月21日係屯門醫院檢查唐氏了)
馮醫生嗰到繼續咁多人，黃生黎到淨係可以坐細路仔凳咋 lol
幸好今次早有準備，先去左隔離三聯買左兩本輕鬆書，兩條友仔邊睇邊等
而且一坐底我就先食個包先，唔再好似上次咁樣衰衰地成口包見醫生 
同上次等候嘅時間差唔多，都係半個鐘左右，就到我了
醫生先問返我上次唐氏檢查成點，同埋mark 返底我黎緊會去邊間健康院做檢查，做左幾多次
跟住就到我地問野
由於上次老公唔得閒陪我見馮醫生，所以今次係等老公問多次有關醫院 & 接生收費嘅資料
結果都係同上次一樣，先照肚，後問問題 XD
當我行去床到準備照嘅時候，老公無啦啦問醫生今次會唔會睇到係男仔定女仔
醫生都好有耐性，解釋返因為而家週數太細，加上呀b 嘅姿勢，未必睇到架
其實我都預左要20週左右先confirm 到，所以今次無咩所謂 XD
冬天照肚好鬼涷，我指啲啫喱 
根據醫生嘅講法，今次黃小b 係攣弓蝦米咁趴左係到 
然後醫生就"dok" 左我個肚幾下，唔知係要叫醒佢定係點呢 -_-...
被騷擾後，咁啱醫生照到黃小b 隻手，又真係見到佢同我地揮手say hi lol
今次醫生比上次照得更詳細 (鬼咩上次咁細根本照唔到啲咩 XD)
照左塊面，睇下啲五官位置，雙手，大腿小腿，蘿柚，仲度埋佢個肚腩
所有野都係一切正常，大小重量同週數吻合
照肚嗰陣馮醫生都講得幾快
不過佢之後都會拎住啲相再慢慢指住，解釋一次啲相係照緊啲咩
(唔解釋真係睇唔明呀 
)
)
指指下個蘿柚，醫生仲講左 有! 機! 會! 係! 仔!
雖然一直以來我呀媽就話係仔 (因為我同佢有左我呀哥嗰陣啲反應好似)
雖然我老公唔知點解又一直覺得會係仔
但當有一個專業人士講「有機會係」嘅時候，心情又會好唔同
其實4大長老＋我地兩公婆對囝囡都無咩所謂，所以唔存在啲咩生仔壓力
只係生仔同生女，不論買衫，改名，教育方向，好多好多野都會有唔同
所以而家半confirm 左一件未知嘅事情，感覺鬆左一口氣，可以再有多啲野為呀b 準備
不過因為醫生都只係話有機會，所以我地兩個都決定等下一次20週左右再照嘅時候，先將可以確實嘅結果話俾4大長老知 
最後都同馮醫生confirm 左會去沙田仁安 & 搵佢接生，如非必要都盡量用順產，唔開刀
臨走兩條友掛住講野＋睇相，興奮得濟唔記得左同姑娘預約返下一次tim
下一次產檢就會係1月12日去健康院檢查了 
No comments:
Post a Comment