陀B日記 - 懷孕前 VS 懷孕後?

是日黃小B 18w4d 

有左黃小B 之後，其實我嘅生活同習慣都無太大分別

但當踏入第18周，開始感覺到胎動，著平時嘅衫見到個肚走左出黎，懷孕嘅感覺就相當之強烈啦 

其實懷孕前後嘅自己有咩改變呢？ 我嘅話就係咁：

懷孕前嘅我：

- 幾乎無野唔食

但平時因為腸胃問題所以有keep 住戒口少食少飲涷野

不過係會照食日本野，因為我夫家&娘家都好鍾意食 lol

西餐生野我都食嘅，總之就乜都食啦 XD

- 行為舉止都唔會注意啦 

又唔係咩靚女，返工又唔洗打扮，同埋同得個運動人一齊，大家都唔太在意外表野lol

再加上夫家係藍領，做野嘅時候大家實在無時間俾你客氣扮斯文，於是粗粗魯魯又一day 

- 一日可以連續用電腦6, 7 個鐘唔郁

呢個係中學到我一直出黎做野都係咁，朋友問我點解可以對住咁耐部電腦

其實真係有好多野可以睇可以做呀 

網購 - 淘寶, gmarket, yahoo, ebay, etc...;

睇綜藝節目 - 中學時代睇台灣日本野，出黎做野睇韓國野，淨係綜藝都追死我 lol;

寫blog - xanga, wow, blogger, facebook... ;

睇唔同嘅資訊 - 「大人物」呢個網真係好多古靈精怪野睇架XD

所以我「電腦兒童」之名並唔係浪得虛名嘅 orz

而我老公係電腦睇嘅野個range 比我更加闊 orz

懷孕後嘅我：

- 飲食方面繼續係咩都食得落

Touchwood 咁講，由一開始到而家，我都無嘔過，亦無咩野食唔到
不過可能因為honeymoon 嗰陣未知有左，當時食左好多青口，忌廉野
而家係呢兩樣野我一諗起就反胃兼作嘔 

亦幸好戒開口，所以就算老公係我面前食魚生，我都無咩感覺，反正仲有大把野食得lol

但好搞笑嘅係，我對燒賣嘅愛係創左人生嘅新高 
只要我一餓，無論係早餐，宵夜，咩時間都好，我第一下都會諗起 - 燒賣...

- 行為舉止，一切以慢 & 小心為上

雖然個肚未大到令我行動有異常，但我都會叫自己所有動作放慢啲去做

行路行慢啲，轉身轉慢啲，人多嘅地方用隻手護住個肚唔好俾人撞到

特別係如果要用到條腰嘅動作，我都會先叫老公幫手，無人係旁邊就自己慢慢郁

坐嘅時候盡量搵野頂住條腰，唔好自己不自覺咁用腰力

少啲拎重野，買野寧願分開兩次都唔好夾硬拎咁重

同埋上落樓梯都會扶住扶手，俾自己習慣要小心啲

係香港生活乜都要快，而家攞正牌「慢活」其實都幾好 

- 少用電腦電話

電腦兒童要戒電腦電話仲慘過戒口 

因為自己新傷舊患，而家有左就更易手痛腰痛，其實一早就應該唔好再用咁多電子野

為左呀自己，為左呀B，我都係遠離幅射啦 

而家除左減少使用嘅時數，亦會提自己用到咁上下就起下身，鬆下隻手同條腰
有時間不如去訓下覺唔好玩電腦啦 lol

--

其實懷孕前 & 懷孕後最大嘅分別，就梗係多左個小生命啦 

每一日都期待呀B踢我兩腳，又好期待佢出世之後嘅生活

雖然明知會好辛苦但仍然甘之如飴 

而家無咩期望，最緊要黃小B 健健康康，其他野真係出左世先再算啦 XD

要加油變肥仔呀!