剛過去嘅星期日(11/1) 去參加左一個免費嘅工作坊 - 母乳餵哺技巧及建立良好親子關係工作坊
主要分兩部份，第一部份由註冊社工講解下如何同初生bb 打好良好嘅親子關係
第二部份由註冊助產士+護士教授母乳餵哺嘅基本知識及技巧
由2:30pm 聽到4:30pm，中間有個10分鐘break 嘅 
嗰日咁啱屋企有餸，就快煮埋個飯，食埋先出去
(獻醜獻醜
)
)
元朗人飛車出去馬鞍山，好彩無遲到 
今次講座唔太多人，計埋我地先得5,6 對準父母
其中一個BB 新年前就會出世啦! 真係鄧佢地高興 
(我見太少人唔好意思影相，所以... 係無相睇嘅orz)
第一部份講座，主要係講點樣同BB 由出世開始建立良好嘅親子關係
家長要俾多啲耐性同及時嘅回應俾BB，等佢有多啲安全感，從而幫助BB 日後嘅性格穩定啲
例如好多家長都話唔好成日抱BB，怕佢會習慣扭計 (我自己都係咁諗)
其實如果唔想抱起BB，都可以坐係床邊同佢傾計或者唱歌，俾BB知道父母係到，父母有回應到佢嘅喊聲
咁都可以令BB 增加安全感
另外家長亦要盡量抽多啲時間陪BB「玩」
明白而家好多都係雙職父母，空閒嘅時間唔多
其實父母只要抽啲時間同BB唱下歌，玩下，咁樣已經係一個好好嘅親子活動
呀社工姐姐講得幾好，幾多笑容，中間又有不同嘅短片睇下，一個鐘都唔覺時間過
第二部份就係講餵母乳嘅知識同技巧，亦都係我點解會有興趣上呢個工作坊嘅重點!
之前自己都有睇關於餵母乳嘅資訊，但講座就係我第一次聽啦~
主講嘅姑娘望落都幾後生，原來佢已經有個6歲嘅小朋友，餵人奶餵到4歲呢，好厲害! 
一開首，都係講下餵母乳嘅好處：
對BB -
1. 營養夠，如DNA，可以幫助BB 腦部發展
2. 初乳含抗體，可以增強BB 抵抗力
對媽媽 -
1. 修身減肥，因為製造母乳都會消耗熱量!
2. 減低患上乳癌，卵巢癌嘅機會
如何正確含乳與吸吮：
餵母乳嘅姿勢有三個：
1. 搖籃式 2. 欖球式 3. 側卧式
(以上圖片都係上網搵，並唔係當日工作坊所用嘅圖片，純粹等大家易啲明白 
)
)
因為當日我地無床 XD
所以姑娘淨係示範左搖籃式&欖球式嘅動作
跟住就到我地實習啦~
又見面啦實習BB XDD
不過今次就我玩BB 比較多，因為姑娘會行去每個媽媽身邊check 動作做得啱唔啱!
今次講座都幾實用，聽得幾開心!
最後仲有個走佬袋 & Nuk 洗水哺乳墊一盒(4片裝) 送返俾出席嘅人tim!
佢地仲有其他工作坊，不過唔知額滿未，有興趣嘅靚太可以 按我 去佢地嘅網站到睇下
我就有報埋2月4日晚係科學館嗰個講座，不過仲未收到通知有無得去，希望有份啦 
