第三次檢查，亦都係我第一次去政府做檢查
返左去天水圍健康院，因為近呀媽，之後啲檢查就可以叫佢陪我去 
因為今次係第一次，又晨咁早830 要到，我就叫左老公陪我了
一去到有啲姐姐幫手登記，跟住拎籌，等叫no. 入房
去政府做檢查係有啲唔同嘅，就係每次都要自備小便，而呢個小便要係朝早早餐前嘅第二次小便
啱啱起身邊有咁多廁所去 
結果飲左一大啖水，等到臨出門口先成功留到 
所以我係無食到早餐就走左去健康院，惟有係中途等待嘅時間先慢慢拎住自己整嘅粥黎食 XD
叫左入房俾姑娘驗小便，度埋高磅重量血壓，就繼續等...
下一步係見姑娘，都係問下病歷，呢段時間有咩唔舒服等
搞掂就再等抽血 & 聽個small talk，簡單講下黎緊政府檢查嘅流程咁
因為我呀爸曾經有過糖尿，所以抽血前比姑娘叫左入房，要排期飲糖水驗下有無妊娠糖尿
仲要係年三十朝早815
又飲糖水又要空腹抽血，希望可以一take pass 唔好嘔又唔好餓到頭暈啦 
今次抽血依然好快，姑娘果然好熟手，而我抽左咁多次血都依然係唔敢望住黎抽 
但感覺抽得比上次係屯門嘅耐，應該抽左2, 3 小支嘅血
抽完血就聽talk, 其實都係講下預約程序，同埋對我黎講好關注嘅餵母乳資訊!
遲啲可以報下健康院啲班黎學下野~
最後就係見醫生
因為見左幾次私家，所以已經無咩好問
咁就上床聽心跳
醫生果然係醫生，拎起部胎心機就即刻搵啱位聽到心跳
難為我自己之前淘左部機返黎但搵左成個鐘都搵唔啱位咩都聽唔到..........
今次記住左個位我返屋企再試過!!!
由登記 - 見姑娘 - 抽血 - 見醫生 - 拎藥
所有野加埋其實成個過程比我想像中已經快左啲，幾乎兩個鐘啫XD
反而覺得呃左老公陪我成朝就真... 因為全部過程陪同人士都唔可以跟住入房 -_-
即係佢兩個鐘就坐係出面訓覺 orz
所以之後所有政府普通檢查一係就自己去，一係搵媽媽陪我去就算了XD
反正之後仲少野check lol
下次檢查就係見馮醫生了~ 因為可以照超聲波，所以老公話一定會陪我去
終於開始覺得佢有啲做人老豆嘅覺悟 
