無辦法，屋企只得兩兄妹，哥哥又未結婚，所以今次係我家第一次辦喜事，媽媽自然緊張啲 
本身「嫁妝箱」呢個項目，我同男朋友都諗住可有可無，偷雞用返屋企個紅色喼就算，慳錢又環保嘛 lol
當然俾媽媽知道左就鬧到我飛起，一來話結婚要用新嘅野，二來話嫁妝呢啲係媽媽嘅心意，所以唔慳得!
本來男人覺得求其買個，做下樣就算，唔洗買好貴，但我開團購嗰啲喼俾佢睇佢又話嗰啲唔夠襟 
結果我同男人又要花時間去搵喼了orz
最後，兩個懶人，近近地係元朗千色買開廚房野，就順便去睇埋喼
第一次睇中嗰個，一千蚊以內，但無紅色
再選，同一個牌子，有紅色，但索價過千 
雖然我同男人都覺得貴，但個喼又真係好「實淨」同啱心意，所以我就膽粗粗whatsapp 個喼俾媽媽
媽媽睇左相＆報價，就話「係幾靚！ 呀囡鍾意就買啦！」
有媽媽嘅同意我就即刻買啦，免得夜長夢多嘛 (慌死會無貨咁lol )
其實搞結婚以來，媽媽係我身上洗左好多錢 (金器都買左2次...)
我曾經好直接咁同過佢講，唔洗買咁多野，我禮金真係俾唔返咁多俾你
但媽媽都只係一句「得架啦」就帶過呢個嚴肅話題
雖然呢個喼只係一個普普通通嘅旅行用品，但到過大禮，結婚當日，佢就係媽媽對女兒嘅其中一份心意，一個祝福。對我黎講，佢嘅價值同媽媽買俾我嘅金器都係一樣!
謝謝媽媽，到結婚嗰朝我應該會對住媽媽喊到豬頭咁嘅樣
