婚後分享(八) - Vendor Review - 梁景琨證婚律師 (上)

證婚律師 - 梁景琨先生

係我定左婚期之後唔知第二定第三樣就confirm 嘅項目

因為我有一部份嘅親戚係專登由廣洲黎香港飲，為左方便親友唔洗註冊處 & 酒樓兩個地方走黎走去

所以我一開始個planning 就決定係酒樓證婚然後晚宴，咁我就唔洗專登安排人手去照顧呢班唔識路嘅親戚了 

點解咁早要confirm?

酒席個期定好左，萬一搵唔到個啱心水又啱時間嘅律師，咪打亂晒我個計劃 

既然呢件事可以早早決定，我呢個緊張大師梗係拿拿聲搞掂佢啦

點解咁早就可以confirm 到?

呢個又係多得貴人 - 伴娘個表姐親身用過後介紹嘅

不過呢個item唔同當初表姐介紹MUA 咁，一黎乜都無理就即刻deposit hold左先

因為自己曾去過朋友嘅婚宴睇證婚，嗰位證婚律師俾我感覺好一般

表達方法比較誇張 & 可能因為朋友係下午證婚，感覺律師好似好趕住去下一場咁...

到自己結婚做資料搜集，先知原來朋友嗰位證婚律師都好出名 

更令我明白到人夾人嘅重要性 orz

咁啱有另一位朋友識得一位好出名嘅證婚律師 - 劉律師

上網search 劉律師係有超級多用家review，圖文並茂讚劉律師好好，笑容滿分

好心動之下當然即刻問下收費如何啦! 咁啱得咁橋係一年前嘅今日send email問嘅 XD

當時佢回覆我元朗區證婚要$3800，對我黎講就貴左少少了 

於是我就問埋表姐介紹嘅梁景琨律師

Email 俾佢都回覆得好快! 唔洗心掛掛 

一年前嘅報價，即係我確實俾嘅價錢，係3千蚊以內，當中已包括註冊費用

不過上網search 就比較少梁律師嘅review，所以都有d 心大心細

最後基於價錢 & 有熟人親身推介 (伴娘都話表姐證婚當晚氣氛好好)

我就confirm 左梁律師做我嘅證婚律師啦 

1月中email 聯絡，約好時間一月尾上去梁律師係旺角嘅office 交資料 & 俾deposit

第一次上去未見到梁律師呢，由佢同事負責幫我搞掂晒啲野

之後就係慢慢等時間過啦，因為中間梁律師佢地會搞掂晒啲文書野 XD

如果無咩特別，係婚前一個月梁律師就會搵你搞掂埋啲手尾 & 俾埋尾數

不過當時嘅我又乜都唔知，心急仔嘅我婚前兩個月就搵梁律師 

梁律師都無乜野，照樣同我約時間見面

7月中上去，見到梁律師真身了! 係一個好nice 仲好鍾意講笑嘅律師

又好好咁解釋返點解唔洗咁心急去搵佢 XD

一路辨手續，氣氛都好輕鬆

我同老公兩個拎唔夠cash 上去俾尾數佢都無野，仲笑返我地轉頭叫我地慢慢落去禁錢 XD

(唔知點解硬係成日都咁樣衰，明知要上去俾錢都可以發生埋啲咁傻仔嘅事 )

見過佢真人之後，我同老公都放心晒，因為知道呢個律師同我地會幾夾

然後結婚前10日左右，佢就whatsapp 幾份唔同嘅誓詞俾我地選擇，作最後準備

有個細位我想特別讚下梁律師，雖然同證婚係無咩關係 

當時應該係8月嘅事

有一日我突然收到佢嘅電話，以為有咩事啦

原來係佢會離開香港去幾日旅行，佢驚我咁啱嗰幾日搵佢但搵唔到，所以預先打俾我通知聲

呢件小事我都而家都仲記得

照計其實所有手尾都搞掂晒，正常情況下我都無咩會搵佢

佢呢個咁有交帶嘅動作實在令我萬分安心阿!!

有交帶實在太重要 

跟住就到結婚註冊當晚啦，下集會講當晚情況