陀B日記 - 拍攝最美孕照 by Esdlife 之收相篇

其實我知道抽中左ESDLIFE 嘅免費孕照拍攝，就like 左今次負責攝影嘅Savour Production 嘅facebook page

可以八掛下黎緊會影啲咩風格嘅相呀嘛 

原來佢地係走自然簡單嘅路線，咁就太好啦！因我好怕啲相好「味精」，唔多啱我嘅style 

仲記得成個拍攝過程都好順利
場地好靚，化妝師好nice，攝影師哥哥亦都一直提住我地點樣擺pose，Esdlife 嘅工作人員好幫得手 

事後睇返Savour Production 嘅facebook page ，先知道佢地除左影相服務之外，係有整埋花球架！

當日3個靚靚鮮花球就係出自佢地手！

因為拍攝過程相當愉快，所以影完相之後一直都好期待可以快啲收到相 

等待嘅中途仲係攝影師嘅facebook page 到見到其他靚媽嘅相！ 引死人咩 

尋晚攝影師仲好有交帶咁send email 話俾我知相已經寄出左，呢幾日要留意信箱，結果今日就收到啦 

包裝精美呢 
除左實物相，仲燒埋碟tim! 方便用電腦upload 返啲相上黎寫blog 

大相我upload 左落相簿(按我)，有興趣嘅靚太們可以入去睇下 

再次多謝ESDLIFE 搞左呢一次免費拍攝活動！
亦感謝Savour Production 幫我們仨影左第一輯相 

好期待睇其他靚媽嘅靚相呀 

Facebook Page: Siuyuen 的生活日記

陀B日記 - 拍攝最美孕照 by Esdlife ＠ 28 Feb 2015

陀B日記 - 孕婦產前產後運動班 ＠ 02 Mar 2015

其實上堂前一個月我就報定呢個由bbcare 舉辨嘅運動班

雖然係收費，但價錢唔貴，又可以同老公一齊上堂，仲有note 拎返屋企

而上堂嘅原因，係因為自己腰背本身都有啲傷，比較弱，所以趁仲未陀仔陀到郁唔到嘅時候，希望可以透過適當嘅運動去挽救下 

懷孕常見身體不適：

1. 腰酸背痛

2. 手腳浮腫

3. 腿部抽筋

懷孕期間做適當嘅運動嘅好處：

1. 可以減輕分娩時痛楚

2. 減少分娩後遺症

適合孕婦嘅運動種類：

1. 帶氧運動 - 如散步，游水，健身單車 <- nbsp="" span="">

2. 針對性運動 - 每日做10-15分鐘 （即係今次課堂所教嘅拉筋鬆弛動作）

運動注意事項：

1. 心跳不應超過每分鐘140次

2. 體溫不應超過攝氏38度

知道左一啲孕婦運動嘅基本資料同注意事項，講者就開始落手落腳教動作同埋叫在場嘅準爸媽一齊做啦~

首先最基本，就係注意坐，企，同埋落床嘅姿勢
而呢啲姿勢，唔只孕媽媽要留意，其實咩人都應該要注意架！

1. 坐 - 選擇有椅背嘅櫈，腰背要有承托嘅，坐嘅時候最好成90度（所以note 幅圖其實都唔係正確示範，因為都係向得太後了）

因為各位孕媽媽條腰多左幾廿磅嘅負重，所以要更加注意坐姿，唔係就好易整親條腰，出現腰酸背痛嘅情況

2. 企 - 唔好「寒背」，孕婦亦可能因為個肚嘅重量，不自覺咁「廷起個肚」黎企，好似無咁累

但呢2個動作其實都好傷腰，自然地企直個人就ok 架啦

3. 落床姿勢 - 其實就算唔係孕婦，都唔應該好似做sit up 咁一下子坐起身，又係傷腰嘅

最好就係打側身，先放雙腳落地，再用隻手慢慢側身撐個人，咁就唔會整到條腰啦~

除左要時刻提醒自己要保持正確嘅姿勢之外，透過一啲適當嘅動作，都可以幫助孕媽媽們舒緩腰酸背痛等問題：

另外亦有提及產後嘅運動：

詳細我唔多講啦，始終我唔可以講晒人地上堂嘅野出黎
媽媽們亦唔好自己亂咁試，因為姿勢唔正確會整親自己架！

雖然今堂嘅野，上完之後就發現所有野老公都識 （因為佢係大半個運動員...)但我覺得都值得一上架！始終唔係個個孕媽媽/ 另一半都係做開運動，知道點樣拉筋架嘛有時間，當係同老公兩個人為自己，為BB 學下野，感覺都唔錯丫 

Facebook Page: Siuyuen 的生活日記

陀B日記 - 雀巢營養天地產前講座
陀B日記 - 靚太學堂之「坐個好月子」免費講座
陀B日記 - 母乳餵哺技巧及建立良好親子關係工作坊
陀B日記 - 靚太學堂之「陀B湊B無難度」免費講座

陀B日記 - 妊娠糖尿中獎記之學習如何控制飲食

上集：陀B日記 - 妊娠糖尿中獎記之檢查過程

中集：陀B日記 - 妊娠糖尿中獎記之學習自行檢查血糖

上回講到學識左點樣用血糖機嘅正確使用方法之後，姑娘姐姐就功成身退

小休之後就到營養師姐姐黎講解下如何控制飲食

等我地呢班妊娠糖尿媽媽點樣可以食得又飽又健康又無咁易令血糖超標 

首先，重溫一下點解會出現妊娠糖尿：

妊娠糖尿是懷孕期間出現的糖尿病，一般在懷孕約五、六個月時才發生，主因是孕婦懷孕期間體重上升，對胰島素需求增加，胰島素是由胰臟分泌出來的荷爾蒙，它促使血液中的葡萄糖進入人體細胞，轉化為日常活動的能量；而把糖分儲藏為脂肪、肝糖或蛋白質的過程，亦有賴胰島素的協助。當胰島素分泌不足或不能發揮正常功效，同時懷孕期間身體會分泌一些抗衡胰島素的荷爾蒙，令胰島素的功能降低。在這情況下，身體無法把食物所供應的糖份轉作能量，過多的糖份便會累積於血液而導致血糖上升，造成妊娠性糖尿。

糖尿病患者每天應定時定量進食來穩定血糖水平。每餐進食的分 量（尤其是碳水化合物（包括糖）的分量）

講到尾，都係啲碳水化合物（糖）作怪 

所以係成個鐘頭嘅課堂入面，營養師重點都係叫我地留意住每一餐碳水化合物嘅攝取量

初初以為，一定無啖好食 / 食唔飽

但原來將所有食物都轉為一份份嘅碳水化合物去計算之後，其實同平時嘅食量差唔多

我發現我自從知道中左獎之後，係比要求嘅份量食少左，即係話我可以再食返多少少野啦 

話明上堂，梗係有note 啦~

首先，我地要搞清楚1份碳水化合物即係有幾多

係note 入面，1份碳水化合物＝10克碳水化合物

而1滿湯匙嘅飯就相等於1份碳水化合物啦

以下就係一個有妊娠糖尿嘅媽媽如果去屯門醫院生BB 嘅話，住院期間嘅飲食安排：

其實計下數，就會發現每一餐嘅碳水化合物份量都唔少架！

早餐可以有4份碳水化合物，午＆晚餐有7份碳水化合物，下午茶同消夜都有3份！

而且肉類，菜呢啲其實仲可以食多少少tim~

以我自己為例，之前我可以食到4分3個外賣飯盒嘅飯 

但而家午，晚餐最多只可以食5滿湯匙嘅飯，其實我唔係好夠飽

通常呢啲時候我就係咁食菜去食飽自己 

同埋因為有肉食，所以其實我係好夠飽嘅~

我未聽書之前直頭連食肉嘅份量都減少左，所以無飯又無肉嘅情況下就成日都覺得好似食左陣風咁啦 

不過當然肉同菜，都要以少油少鹽少調味嘅方法去煮

如果唔係到時就唔係淨係得妊娠糖尿呢個問題架啦 

另外，因為怕我地啲血糖會上上落落，所以少食多餐就最好

營養師唔建議我地餐與餐之間相距嘅時間太長，最好3,4小時就食啲野

於是我就可以奉旨食下午茶同消夜啦 

當然份量唔會多，最多都係3份碳水化合物，所以食半分三文治，飲杯奶就無架啦

不過都好過無 

其實仲有好多野可以食嘅，以下呢個食物換算表就有好多例子俾我地參考返每個份量嘅食物大概等於幾多份碳水化合物

識計數之後，就發現原來好多野都「唔抵食」 
例如：2粒栗子/ 4粒馬蹄就＝1分碳水化合物，咁我梗係選擇食飯啦 
又例如：3分1條粟米＝1分碳水化合物，所以又係唔太抵食
再例如：一個菜肉包＝2分碳水化合物，非常唔抵食呀! XD但我至愛嘅燒賣一籠4粒先等於1分碳水化合物，做下午茶嘅話我仲可以食到其他野對我黎講係一大喜訊 

當大家都對每日碳水化合物嘅攝取量有初步嘅概念之後就要學下平時日常生活中點樣去選購適合嘅食品啦

每次買野食，都要睇下食品包裝上面嘅營養標籤，有關碳水化合物嘅含量，咁就可以計算到自己到底可以食幾多（伸延閱讀相關資料可按我）

聽完書之後，就發現其實唔洗點樣特別去戒口，只要比平時花多少少時間去計數，控制好碳水化合物嘅攝取量，其實就已經好OK
所以，各位中左獎又或者好怕會中獎嘅準媽媽們，其實唔洗太擔心
乖乖地控制飲食，依然可以好好enjoy 呢個懷孕嘅過程呀 

Facebook Page: Siuyuen 的生活日記

陀B日記 - 妊娠糖尿中獎記之學習自行檢查血糖
陀B日記 - 妊娠糖尿中獎記之檢查過程
陀B日記 - 什麼是妊娠糖尿病？（網上轉載）
陀B日記 - 第六次產檢 @ 17 Feb 2015
陀B日記 - 結構性超聲波檢查 ＠ 20 Jan 2015
陀B日記 - 中場檢討 ＠ 20w0d
陀B日記 - 第五次產檢 @ 12 Jan 2015
陀B日記 - 第四次產檢 @ 16 Dec 2014第三次產檢 @ 02 Dec 2014準爸媽資訊分享 － 唐氏綜合症的產前測試
黃小B 日記 - 早孕期唐氏綜合症普查
第二次產檢 @ 17 Nov 2014
第一次見黃小B! @ 03 Nov 2014

陀B日記 - 妊娠糖尿中獎記之學習自行檢查血糖

上集: 陀B日記 - 妊娠糖尿中獎記之檢查過程

話說年三十檢查完，滿心歡喜咁去迎接新年，仲去埋泰國旅行
一路諗住無收到電話，即係無事啦!
但係泰國玩到半路先醒起：轉左張電話卡又無飛線，梗係收唔到電話啦 
不過都無理到咁多，因為已經身在外地，返到黎有miss call / voice mail 再算啦 

結果，返到黎香港嗰晚，我呀媽就刹有介事咁樣叫我打俾佢 （愈扮無野愈有野嗰啲呢 ）

原來年初五健康院已經打過俾我，不過打唔到，於是就打左返去我娘家

我呀媽就幫我book 左年初九朝早去健康院見醫生

基本上叫得你返去見醫生，即係confirm 中左獎架啦

果不其然，健康院醫生係超頹就見完左，見左5分鐘都無 
都係話返俾你知飲糖水之前幾多度，飲完之後幾多度，同埋俾返晒所有排版文件俾我，轉介我之後嘅檢查都要去屯門醫院做

我空腹抽血血糖係正常o既，4.4

但飲完糖水再抽血，血糖就比標準高左0.1，8.6

你話收到消息嗰一刻，無唔開心/ 擔心就假o既 

自問自己有左之後，戒口都戒得好清，甜野真係幾乎無食過
自己年紀又唔係大，真係無諗到自己會中獎
諗返轉頭，中獎原因我相信同我有左之後食飯/ 麵多左有關 

於是，同一日下午就拎埋文件出去屯門醫院約期，一開始約期要4月2日先有得睇，咁咪要等成個月 
幸好之後就收到醫院電話，11號就有得睇啦 

3月11日，準時10點鐘同老公一齊到屯門醫院E1
好有親切感呀，因為上次做唐氏都係黎呢到XD

是日流程：
到E1 登記聽妊娠糖尿講座 -> 到地下大堂租血糖機 & 去會計部俾$100 買飛仔聽營養師講野 -> 上返E1 聽姑娘講解什麼是妊娠糖尿 & 教用血糖機 -> 聽營養師講解如何控制飲食 

因為有老公陪我去，所以我就留係E1 登記辦手續，老公就落醫院地下幫手租血糖機同埋去交錢

租血糖機原來係公價，$290 

今日聽講座o既唔係好多人，計埋我都係6個媽媽
負責講talk o既姑娘好funny，解釋妊娠糖尿講得清楚又生動，聽完亦唔會令到你好擔憂，聽 & 睇得出佢好senior 
姑娘講左一句我覺得好窩心嘅 ：

嗱，其實妊娠糖尿呢樣野就係呀B 送俾你地嘅，enjoy 呢個懷孕過程就ok，總之乖乖地，好好控制飲食啦!

聽完妊娠糖尿嘅基本資訊，重頭戲就梗係學習如何正確地自己吉自己啦 

呢set 野就係黎緊會陪到我生黃小B 為止嘅「血糖監測系統」了 
當然我唔會親身示範點用啦，睇圖就好了 XD

用法好簡單好清晰，姑娘亦超級細心咁講解，所以你想話唔識所以唔吉手指呢，係無呢個可能嘅 
其實吉落去，比想象中唔痛喎（因為我聽人講過話痛到好似俾釘書機釘咁痛 ）

不過個心理關口就真係難過啲，因為每次一按落去個發射器到就即係話俾自己知又要俾針吉啦 

幸好，每星期只係要吉兩日，不過每日吉6次 

分別係：早餐前（空腹），早餐後2小時，午餐前，午餐後2小時，晚餐前，晚餐後2小時

其實好易記，總之食野前吉一次，跟住食第一啖野落肚起計2小時，再吉，就搞掂

不過通常做做下其他野都會唔記得左餐後嗰一次，所以最好較定個鬧鐘提住自己 

因為排左期3月19號返去覆診，所以姑娘就叫我地15-18號，抽其中兩日「做功課」啦 

下集會講埋營養師姐姐教我地呢班糖尿孕媽媽如何食得又飽又健康又唔會令自己血糖超標 XD

Facebook Page: Siuyuen 的生活日記

陀B日記 - 妊娠糖尿中獎記之檢查過程
陀B日記 - 什麼是妊娠糖尿病？（網上轉載）
陀B日記 - 第六次產檢 @ 17 Feb 2015
陀B日記 - 結構性超聲波檢查 ＠ 20 Jan 2015
陀B日記 - 中場檢討 ＠ 20w0d
陀B日記 - 第五次產檢 @ 12 Jan 2015
陀B日記 - 第四次產檢 @ 16 Dec 2014第三次產檢 @ 02 Dec 2014準爸媽資訊分享 － 唐氏綜合症的產前測試
黃小B 日記 - 早孕期唐氏綜合症普查
第二次產檢 @ 17 Nov 2014
第一次見黃小B! @ 03 Nov 2014