奶媽小記 - 無啦啦塞奶

年資一年四個半月嘅奶媽表示，無諗過今時今日仲會塞奶 🙄
口痕之過食左兩晚蠔仔粥，第二日初時見有啲痛，以為自己有幻覺
點知，沖涼時見到痛嘅位置紅左，先知道原來塞奶不是夢 
因為本身我嘅奶水脂肪唔多，所以即使我坐月期間食花膠，食榴蓮，我都無乜點塞過奶
實在無諗過喺已經唔識谷奶漏奶嘅日子，竟然仲會遇上塞奶呢個問題 🤔

每個人奶媽媽都有佢嘅「上奶寶」
而我嘅上奶寶就係－蠔！ （生熟都得）
喺過左坐月嘅日子，老公為左慰勞我，喺難得放底呀仔出街食飯嘅日子就會帶我食我鍾意食嘅野
因為老公唔食生蠔，通常我都係食兩，三隻就算
記得生完第一次食生蠔之後嘅第二朝，我係成身濕晒咁醒 
（已經落左墊先訓覺，但仍然好似黃河泛濫咁樣樣 -＿-）
自此我就知道，蠔對我黎講除左係好味之外，仲係保住呀仔糧倉嘅重要食材


除左蠔之外，其實上奶食物仲有好多－
三文魚，黑豆，花生，木瓜，魚湯，etc... 真係多到數都數唔晒！
（最重要還是家人嘅支持 ＆ 愉快嘅心情阿）

每個🍼媽嘅體質都唔一樣
希望大家都可以搵到自己鍾意而又爆奶嘅上奶寶啦 ✨

同朋友仔一齊去Lazy Walk!

1010，蛋黃小B 登場！

同朋友仔一齊去左科學園搵蛋黃哥玩lazy walk～
本來媽媽唔係好舒服，諗住去到交俾爸爸同樂希玩
原來貪玩能醫百病，加上天氣又好
最後同朋友仔兩家人齊齊行晒全程 ✌🏻️

兩個年紀相約嘅男生
一齊為左玩車而瘋狂，又一齊唔知做緊乜咁周圍行 
兩個BB 開始有少少交流，真係好得意

特別嗚謝丁媽嘅一雙巧手，樂希又有靚衫著！ 

樂希16個月快樂 🎉

1011，樂希16個月快樂 

16個月嘅樂希係咁嘅：

• 識行未識跑 

行得穩左好多，出街行商場好少跌啦

但行草地公園地就要繼續努力訓練下啲平衡力 💪🏻

• 好 鍾 意 向 上 爬

包括屋企嘅任何櫈，梳化，安全圍欄

娘家嘅窗花（望落去成廿層樓咁高，仲要爬到un un 下個pat pat🙄）

公園個瀡滑梯 （係呀，唔係瀡架，拎黎爬上去架咋）

雖然樂希而家識行，但佢對「爬」嘅需求仍然好高

唔要平面咁爬，而係要上上落落，追求刺激感

但又唔係真係爬得叻，成日識上唔識落，就睇你幾時撞層樓出黎 LOL

• 說話方面，可以講到4－5 個字啦 

有時可以人＋物件咁表達

第一次聽嘅字，有7成可以即時跟住你講

同埋小朋友嘅記性真係好好，教過一次佢就記得嗰樣野叫咩名

所以對住呢隻鸚鵡講野要好小心 😶

• 又講出牙，一係唔出，一出就趕住唔知去邊咁 😐

2隻下臼齒用一個月時間終於一齊出晒

2隻下犬齒出左一半

2隻上犬齒都準備破肉而出

（喂，啲上臼齒去左邊？）

真係睇見都覺得牙肉痛 

--

雖然樂希看似好多野識講，但其實說話當中嘅意思佢係搞唔清嘅

例如 －

老媽：「樂希你叫咩名呀？」

樂希：「咩名～」

老媽：「⋯⋯」 （咩玩法呀仔？）

又例如 －

老媽：「樂希你食唔食西瓜呀？」

樂希：「唔食！」

但同時又「呀」到勁大個口等你俾舊瓜佢 🙄

老媽你都係努力教啦 

（相中樂希：識開一定係拎住個LV 黎開鎖 ）

開心share 系列 - Huggies 全新Platinum 鉑金級助防疹紙尿片

幸運媽媽又有正野俾樂希試用啦 🤘🏻

今次試用嘅係Huggies 全新Platinum 鉑金級助防疹紙尿片！

尿片對樂希 ＆ 我黎講實在太重要

由樂希出世都而家，個pat pat 被無數條尿片包住過，真係沖涼嗰陣先至唔洗著

佢個pat pat 靚唔靚仔，健唔健康，就靠晒條片

而Huggies 今次新尿片主打防尿疹

令我喺收到呢個邀請之前已經主動上佢地嘅網站拎左試用裝啦 

資料顯示

全新Platinum 鉑金級助防疹紙尿片加倍乾爽

內表層特有3D呼吸層，減少與BB肌膚接觸

外層擁有千萬個納米級透氣微孔，呼出悶熱濕氣。

加上6000個吸收孔，吸水珠珠同容量都有所提升

醫學實証，有助預防尿疹

到底係咪真係咁好用呢？

我俾樂希試用左2日，其中經歷左一晚差唔多12 小時無換過片

第二朝，雖然條片石頭咁重 

但摸上手都算乾爽，唔會覺得啲衫 ／ 條片嘅表面因為滲漏而濕濕地

暫時見到呀仔個pat pat 仲係靚仔嘅😎

想試但又擔心BB 著左唔知啱唔啱嘅，都唔怕！

Huggies 推出左全港首個針對BB 尿疹保障 － Huggies 鉑金保

全港BB 都受保！ 所有全新Platinum 鉑金級系列嘅用戶，如果對產品預防尿布疹成效有任何不滿，可獲原銀奉還，並免費獲得一次專業醫護人員諮詢服務

真係第一次聽見尿片咁完善嘅售後服務 

話晒平時如果用左啲尿片樂希出現紅pat pat 嘅話，媽媽只能默默買過另一款尿片... 浪費金錢呀 🙄

今次試用全新Platinum 鉑金級助防疹紙尿片係一次滿意又愉快嘅試用經歷！

除左尿片之外，我仲收條好靚嘅口水肩 ＆ 得意熊仔造形毛巾！大開心～

謝謝Huggies！謝謝公關姐姐 ✌🏻

＊以上資料由Huggies 提供

Huggies HK

Frement PR
#HuggiesHK
#防尿疹尿片
#首個尿疹保險

戰友byebye 👋🏻

種左82日嘅羅勒們要離開啦，由我媽正式接手繼續發光發亮 ✨
咁大個人都仲要老媽幫手執手尾，所以幾時都係媽媽好🤘🏻

上一次三棵都係羅勒

今次三棵都唔同：

苔蘚玫瑰 Moss Rose

牽牛花 Petunia

蕃茄仔 Mini Tomato

種花雖然無得食，但可以幫屋企添置唔同嘅色彩，係開心嘅！

至於蕃茄仔我同呀仔都食，所以今次種左唔會浪費啦 Σ(￣。￣ﾉ)ﾉ

好期待收成一刻呀

#clickandgrow

#smartherbgarden

識呃人嘅樂希

105，仲有一星期就一歲四個月嘅樂希

已經識得玩爸爸媽媽 

見到樂希開懷大笑嘅樣子

爸爸媽媽嘅心即刻溶晒 (*¯︶¯*)

呢個小子俾到媽媽很多很多動力

（雖然老媽仍然係會攰 會眼訓 會撻皮）

每日都好感謝樂希呢個開心果陪住我地 ( ´▽｀)

願你我都找到屬於自己的快樂泉源 

無啦啦遊西貢

101，西貢半日遊

話說下午去左觀塘同朋友仔見個面完成交收後

無野做嘅我們仨走左去西貢

是日天氣好好

吹黎嘅海風涼浸浸咁，好舒服

三個人喺望到海嘅地方食下野，行下玩下，係寫意嘅

喺香港，放假嘅時候好唔想留喺啲商場入面

有冷氣係好爽

但人多到根本行唔郁咁濟 

（其實周圍都咁多人...）

大型連鎖店賣嘅野又千篇一律

如果無小朋友，放假我寧願留喺屋企砌lego 🙄

（對我很宅🙋🏻）

有小朋友之後，因為呀仔平時好多時間都留喺屋企，爸爸一放假有車用就會想帶佢出街望下山，望下海 

再大少少就可以帶佢去農場自己種瓜種菜 🌽

雖然好攰 

（前一晚因爲呢個反訓細路被迫通左一晚頂(¬_¬)

但係喺難得嘅Family Day，可以一家三口一齊玩一日，是幸福嘅

亦都辛苦你啦司機大人 🙆🏻

係咪人人都有鋪「種野」嘅癮？

話說7月嘅時候買左個 Click & Grow​ 嘅THE SMART HERB GARDEN 返屋企玩

得閒睇下水，淋下水就搞掂

放喺室內，又唔怕風吹雨打

個Garden 連埋LED 燈，就算日日天陰都唔怕無得曬

啲香草真係零技術就生到一棵棵

因為佢個入門set 無得㨂一定係跟Basil，但我好少食，結果得個種字，覺得對唔住佢地呀 🙁

所以最近就睇下有咩其他野真係自己想種嘅，準備refill

（媽媽我真係好想買聖誕樹嘅種子返黎種呀 T＿T）

原來佢地啱啱出左個新product: The Wall Farm

可 以 成 個 櫃 種 晒

如果屋企有位，我一定會搬一個返屋企！！！

（仲要一買就買個大嘅 XDDD）

如果一返到屋企就可以見到成個櫃都係唔同色嘅花花草草

你話係幾咁開心呢 

（其實唔係有種野嘅癮，只係有鋪發花癲嘅癮 

《我是懶媽》

每日陪住樂希飲飲食食，玩呢樣玩嗰樣

好多時候，我呢個懶人媽媽都係坐左係到「出口術」

成地玩具佢都要行黎行去

我只會同佢講聲「睇路」

佢要爬上梳化但唔夠高

我只會坐 / 企喺佢後面睇佢爬，真係跌落黎我先接住佢

原來佢早已識得避開啲障礙物

原來佢早已知道邊個位最易爬上梳化

玩玩具，盡量我都由佢自己玩

佢要發揮創意，倒轉黎玩，我會話俾自己聽呢個都係玩法之一

就睇佢可以玩啲咩出黎 LOL

當嘗試腦輕鬆咁陪住樂希「把玩」個玩具

而唔係忙於問佢「呢個係咩黎架？」「呢件玩具係咩色架？」 嘅時候

你先可以真正留心佢嘅一舉一動

佢點樣觀察個玩具，點樣搵啲玩具嘅開關，點樣自創 / 模仿你嘅玩法

媽媽放開手，先睇到佢地大得幾咁快，學習能力幾咁強

大家齊齊學做懶媽！ 🤗

WOW BBsss 中秋野餐聚

WOW BBsss 人齊相聚係開心嘅☺️

是日天公造美，中秋佳節去野餐！

大人細路都玩得好開心呀☺️

大人食緊熱氣野嘅時候，細路們都有一大堆零食🤘🏻🤘🏻

睇住大家爭野食真係好搞笑🙈

記得第一次見面，都係去野餐

嗰陣bb 們淨係識坐喺到，最細嘅樂希唔識坐架，要抱捉全程，攰到我呢

今日見面，個個都識行識走 識講野 識片車 識搵野玩 識搶野食

時間過得真係好快 (´･_･`)

人大左之後，本身好摺嘅我已經無乜朋友

無返工就更加自閉

多謝呀仔，令我有緣認識呢班媽媽朋友

閒時whatsapp 吹水

過時過節會出黎玩下，一齊傾下湊仔經

亦可以一齊見證大家仔女嘅成長

成件事都好amazingggggggggg ◉‿◉

第時BB 們要返學就好難約出黎見面，諗起就好唔捨得啦

可唔可以唔好咁快讀書？

可唔可以再多啲約出黎玩呀媽咪？

（噢講完自己都覺得有點兒肉麻）

（感性mode 原來on 左）

2016 中秋節快樂！

915，樂希同大家講聲中秋節快樂！

#好彩趕得切中秋節出post
#中秋節未過就byebye
#公園多人到唔知點玩

黃小B 日記 - 15個月快樂！

15個月嘅樂希：

• 識行識走啦
學我呀媽話齋：「一係唔行，一識得行就想跑」
用左一個月時間學行嘅樂希，無乜點跌過
（太穩陣嘅細路，一有咩事就踎低左先）
第一次帶佢離開屋企出街落地行，最初諗佢會唔會驚呢
結果興奮到想捉都捉唔住🙄
出街除左驚驚 / 扭眼訓之外，其餘時間都唔鍾意人地拖住行

• 講到三個字啦！ 奇怪爸媽教識樂希講「確觀cup」
（係呀係泰文嘅「多謝」 呀）
知道自己做錯事會自動講「sorry」
有求於人會自動講「唔該」，有時出街聽到我地同人地講唔該佢又會跟住講，好搞笑 
成鬼日食食下飯講「哈蜜瓜」🙄，因為唔想食飯想食生果
指令聽得明 & 會跟住做（睇心情啦下）
有問有答（其實佢未明我地問咩，只係人講佢又講）

• 呢個月食多左少少野，樂希終於到達20磅啦👏🏻👏🏻
（其實男仔黎講真係好輕飄飄，不過唔緊要啦，健康就好）
同埋多得爸爸嘅唔小心，呀仔食左佢人生第一次嘅雪糕，係鍾意嘅 😋

• 上年百日宴左右開始著中碼片片，一年後終於著到大碼啦！
NB －＞ 中碼用左3個月多啲，中碼－＞大碼用左一年時間
頭嗰3個月嘅生長速度真係好驚人 🙉

• 終於，終於，終於！ 等左好一段時間嘅第9，10隻牙，浮出水面啦！ 又係一出牙就兩隻一齊出0.0
佢今次出牙就辛苦啦，訓唔到又唔想食野咁，可能大牙難出啲？ 🤔
受出牙影響，健康小子今個月有點小狀況
體溫有啲唔穩定，無啦啦低燒
（未到38度，但又keep 住比平常高0.5-1度左右）
發燒嘅時間唔定，有時中午，有時夜晚
訓醒覺食下野 / 玩玩下就會自己退燒
除左胃口差少少，訓痾玩都無受影響
希望小子快啲回復正常啦 orz

--

自從樂希識得行路之後，佢嘅可愛程度又再創新高
（瘋狂媽媽mode on）
拎住啲野周圍走真係好過癮 
希望你一路成長都可以好似而家咁，大無畏勇敢地行去你想去嘅地方啦